Qaraqalpaqstan Respublikası Densawlıqtı saqlaw ministrligi tárepinen ǵalaba xabar qurallarınıń wákilleri ushın Taqıyatas rayonlıq medicina birlespesine press-tur shólkemlestirildi.
Press-turda rayon medicina birlespesi baslıǵı wazıypasın waqtınsha atqarıwshı Duysen Aytimbetov ǵalaba xabar qurallarınıń wákillerin birlespede jaratılǵan imkaniyatlar menen jaqınnan tanıstırdı.
Atap ótilgenindey, Elimizde alıp barılıp atırǵan áhmietli reformalar dáwirinde rayonlıq medicina tarawında da bir qansha unamlı ózgerisler júz berdi. Atap aytqanda, sońǵı 2 jıl ishinde rayonlıq medicina birlespesiniń emlew-profilaktika mákemeleriniń materiallıq-texnikalıq bazası kúsheytilip, 2023-jılı rayonlıq kóp tarmaqlı oraylıq poliklinikasınıń 1-smenada 150 qatnaw quwatlılıǵına ie jańa imaratınıń hám 2025-jıldıń 1-shereginde 1 shańaraqlıq poliklinikanıń jańa imaratınıń paydalanıwǵa tapsırılıwı, alıs aymaqlarda jaylasqan 5 elatlı punktlerde “Mákan medicina punktleri”niń (MMP) jaylastırılıwı, tuwıwǵa járdemlesiw, xirurgiya bólimi imaratı bóliminde kapital qurılıs-ońlaw jumıslarınıń tolıq ámelge asırılıwı, zamanagóy medicinalıq apparatlar, ásbap-úskeneler, dári-dármaq, medicinalıq buyımlar menen támiyinleniw dárejesiniń bir qansha jaqsılanıwı xalıqqa medicinalıq xızmet kórsetiw kólemine hám sapasına belgili dárejede unamlı tásir kórsetti.
Házirgi kúnde rayon xalqına (77389 jasawshı xalıq, sonıń ishinde, 20575 bala-26,6%, 3251 jas óspirimler-4,2%, 53563 -69,2% 18 jas hám onnan joqarı xalıq, stat. maǵlıwmatı) sapalı qánigelestirilgen stacionar járdemi 5 profil boyınsha jámi 160 turaqlı emlew ornına iye rayonlıq oraylıq emlewxanası tárepinen támiyinlense, ambulatoriya-poliklinika xızmeti 1 KTOP, 1 SHP, 2 SHSHP, 5 MMP (mákan medicina punktleri) tárepinen medicinalıq járdem kórsetiledi.
Bunnan tısqarı, ambulator-poliklinika mákemelerinde xalıq ushın emleniwge qolaylı usıl esaplanǵan 40 orınlıq kúndizgi emlew stacionarları, oraylıq emlewxanada 15 orınlıq tólemli stacionar emlew ornı, sonday-aq, úy sharayatında emlew orınları shólkemlestirilgen bolıp, xalıqtıń medicinalıq xızmetke bolǵan talabı qanaatlandırılmaqta.
Ambulatoriya-poliklinika mákemeleri janındaǵı kúndizgi emlew stacionarlarında (4 АSHPda) emleniwshi nawqaslar sanı jıldan-jılǵa kóbeyip, 2025-jıldıń 1-yarımında 424 nawqas emlenip, birinshiden emlew dinamikasınıń ósiwine aymaqlarda sońǵı jıllardaǵı infrastrukturanıń rawajlanıwı sebep bolsa, ekinshiden emlewdiń bul usılınan paydalanıwdıń qolaylıǵı hám abzallıǵına xalıqtıń túsinip jetkenliginen dárek beredi.
Ambulator-poliklinika mákemeleri shıpakerlerine xalıqtıń qatnawlarınıń sanı jıldan-jılǵa artıp, 2024-jılı jámi 401974 qatnawlar esapqa alınıp, hár bir xalıqqa jıllıq 5,2 qatnawdan tuwra kelse, 2024-jıldıń ótken 1-shereginde 203054 qatnawlar esapqa alınıp, hár bir xalıqqa 2,6 qatnawdan tuwra keldi (jıllıq prognoz 5,6), xalıqtıń qatnawlarınıń sanı ósiw tendenciyasına ie. Qatnawlardıń sebepleri boyınsha 59,7% profilaktikalıq maqsetlerde, 40,3% kesellikler sebepli bolsa, 2024-jıldıń usı dáwirine salıstırǵanda kesellikler boyınsha xalıqtıń QVPlarǵa múrájatı 10,4% ke azaydı. Sebebi, birinshiden, keselliklerdiń azayıw tendenciyasına keyingi dáwirde xalıq arasında keselleniw qáwpin jáne kesellikti erte basqıshta anıqlawǵa baǵdarlanǵan bir neshe profilaktikalıq maqsetlerdegi skrining tekseriwleriniń ámelge asırılıwı tásir kórsetse, ekinshiden emlew-profilaktikalıq mákemelerdiń resurslar, kadrlar, diagnostika ásbap-úskeneleri menen támiyinleniwi sebep boldı.
Bunnan soń press-tur qatnasıwshıları usı jıldıń aprel ayında paydalanıwǵa tapsırılǵan 200 orınlı jaqtı, keń hám zamanagóy shańaraqlıq poliklinikaniń imkaniyatları menen tanıstı. Zamanagóy medicinalıq úskeneler ornatılǵanı, shıpakerler hám nawqaslar ushın qolaylı sharayatlar jaratılǵanı kórgen kózdi quwandıradı. ⠀
Press-tur dawamında qatnasıwshılar shıpakerlerdiń jumısı hám puqaralar ushın jaratılǵan sharayatlar menen tanısıp, ózlerin qızıqtırǵan sorawlarına juwap aldı.
