Qaraqalpaqstan Respublikası AIJS-na qarsı gúresiw orayı tárepinen densawlıqtı saqlaw tarawında ámelge asırılıp atırǵan profilaktikalıq ilajlar sheńberinde búgin Ózbekstan mámleketlik kórkem óner hám mádeniyat institutı Nókis filialında 1-dekabr – Dúnya júzilik AIJSqa qarsı gúresiw kúni múnásibeti menen ilajı shólkemlestirildi.

Ilajda jaslar arasında salamat turmıs tárizin úgit-násiyatlaw, AIV hám AIJS haqqında túsinikler beriw, onıń aldın alıw boyınsha xalıqaralıq tájiriybeler hám ilimiy tiykarlanǵan maǵlıwmatlardı jetkeriw maqset etilgen.

Ilajda AIJS-na qarsı guresiw orayı lobarant shıpakeri B. Yusupova hám Respublikalıq AIJS-na qarsı guresiw orayı epidemiolog shıpaker járdemshisi B. Allambergenovlar tárepinen AIJS infekciyası juǵıw jolları, tarqalıw sebepleri, onıń aqıbetleri hám qáwipsizlik ilajlarına baylanıslı tolıq maǵlıwmatlar berildi. Sonday-aq, jaslardıń medicinalıq mádeniyatın arttırıw, zıyanlı ádetlerden uzaq bolıwǵa shaqırıwshı usınıslar da aytıldı.

Eń áhmiyetli táreplerden biri sıpatında ilaj qatnasıwshılarına ıqtiyarlı túrde qan arqalı ekspress-test tapsırıw imkaniyatı jaratıldı. Bul test arqalı studentler óz densawlıǵınıń jaǵdayın tekseriw, keselliktiń aldın alıw boyınsha qosımsha usınıslar aldı. Ekspress-test processleri medicina qánigeleri tárepinen belgilengen sanitariyalıq-gigienalıq talaplarǵa qatań ámel etken halda ámelge asırıldı.