Qaraqalpaqstan Respublikası Densawlıqtı saqlaw ministrliginiń baslaması menen oraylıq hám jergilikli ǵalaba xabar qurallarınıń wákilleri ushın Nókis qalasındaǵı Balalar medicinalıq reabilitaciya orayına media-tur shólkemlestirildi.
Qaraqalpaqstan Respublikası Balalar medicinalıq reabilitaciya orayı Ózbekstan Respublikası Prezidentiniń 2022-jıl 7-iyuldegi “Qaraqalpaqstan Respublikasında 2022-2024-jıllarda xalıqtıń salamatlıǵın qorǵawdı bunnan bılay da kúsheytiw haqqında”ǵı qararınıń 1-bántine tiykarlanıp shólkemlestirildi. 2023-jıldıń fevral ayınan baslap, Qaraqalpaqstan Respublikası boyınsha sozılmalı keselligi hám mayıplıǵı bolǵan balalarǵa medicinalıq reabilitaciya xızmetin kórsetip kelmekte. Oray 120 orınǵa mólsherlengen bolıp, hár biri 30 orınlıq bolǵan travmatologiya, pulmonologiya, nevrologiya hám kardiorevmatologiya bólimlerinen ibarat.
Oraydıń tiykarǵı wazıypalarınan biri 18 jasqa shekemgi mayıp hám nawqas balalardıń jasaw sharayatın jaqsılaw, sonıń menen birge salamatlıǵın tiklew (reabilitaciyalaw) arqalı emlew, mayıplıqtıń aldın alıw, keselliklerdiń profilaktikası hám medicinalıq reabilitaciya boyınsha joqarı texnologiyalarǵa tiykarlanǵan qánigelestirilgen járdemge bolǵan talaptı qanaatlandırıwdan ibarat.
Ózine biriktirilgen wazıypalardı ámelge asırıw maqsetinde orayda zamanagóy medicinalıq ásbap-úskeneler menen támiyinlengen laboratoriya, fizioterapiya bólimleri shólkemlestirilgen. Tar taraw qánigelerinen otolaringolog, okulist, psixoterapevt, stomatologlar menen támiyinlengen.
Orayda 20 shıpaker, 62 miyirbiyke, 55 kishi buwın, 4 pedagog, 20 xojalıq qánigesi xızmet kórsetip kelmekte. Shıpakerlerden 5 joqarı, 2 birinshi hám 3 ekinshi kategoriya qánigeligine iye bolıp, qánigelik kategoriyası dárejesi boyınsha 50 procentti quraydı. Orta buwın xızmetkerlerinen 19 adam joqarı, 9 adam birinshi hám 5 adam ekinshi kategoriyalı mamanlıqqa iye.
Oraydıń laboratoriya bólimi zamanagóy ásbap-úskeneler menen támiyinlengen bolıp, emlewxananıń bólimlerinde stacionar sharayatında emlenip atırǵan nawqaslardan ulıwma klinikalıq, gemotologiyalıq hám bioximiyalıq analizleri alınıp, tekseriledi. 2025-jıl dawamında laboratoriya bólimi tárepinen jámi 54 mıń 92 ulıwma klinikalıq, gematologiyalıq hám bioximiyalıq analizler biypul tekseriledi.
Orayda ótken jıl dawamında mayıplıǵı hám sozılmalı keselligi bar 3 mıń 138 bala emlenip shıqqan. Olardan 803 i mayıplıǵı bar hám 2 mıń 335 sozılmalı keselligi bar balalardı quraǵan. Barlıq qolaylı sharayatlar jaratılǵan hám eń zamanagóy medicinalıq úskeneler menen támiyinlengen bul orayda mayıplıǵı anıqlanǵan balalar jılına 12-14 kúnnen eki márte biypul emlenedi. Balalar 5 mezgil, olardıń kútiwshileri bolsa 3 mezgil awqat penen támiyinlenedi.
Qaraqalpaqstan Respublikası Joqarǵı Keńesi Prezidiumınıń arnawlı qararı tiykarında 2024-jılı 2 milliard 275 million sumǵa TMS, ENMG, sanlı rentgen, UDT hám EKG, 2025-jılı “Mehirli insanlar” fondı tárepinen balalar dem alıw bólmesi, emlew-fizkultura bólmesi, 2026-jılı suw procedura bólmeleri kerekli ásbap-úskeneler menen támiyinlendi.
Press-tur qatnasıwshıları orayda emleniwshiler ushın jaratılǵan sharayatlar menen jaqınnan tanıstı hám ózlerin qızıqtırǵan sorawlarǵa juwap aldı.
