Usı jıldıń 25-aprelinen – 25-mayına shekem “Bar mehrimiz usı Watan, usı xalıq ushın” súreni astında elimizde “Salamatlıq aylıǵı” sheńberinde respublikamızdıń barlıq aymaqlarında sonıń ishinde, alıs hám shetki awıllarında xalıq ushın medicinalıq tekseriwler shólkemlestiriliwi belgilengen.

Bugin paytaxtımızdıń “Náwpir” mákan puqaralar jıyınında  “Salamatlıq aylıǵı” sheńberinde ilájlarģa start berildi.

Onda Ózbekstan Respublikası Salamatlıq hám strategiyalıq rawajlanıw institutınıń bas qánigesi Roza Erimbetova, Salamatlıq hám strategiyalıq rawajlanıw institutı Qaraqalpaqstan Respublikası aymaqlıq bólimi baslıǵı Zafar Kudaybergenov, usı bólimniń qánigeleri, Nókis qalalıq medicina birlespesine qaraslı 7-sanlı shańaraqlıq poliklinikasınıń medicina xızmetkerleri, “Náwpir” mákan puqaralar jıyını puqaraları qatnastı.

Ilájda sózge shıqqanlar “Salamat turmıs tárizi,” “Durıs awqatlanıw” boyınsha keń túsinik berip ótti. Ilaj dawamında puqaralardıń qan basımı, dene salmaǵı ólshenip, medicinalıq másláhátler berildi.

Sonday-aq, aymaqtaǵı dene shınıǵıwları menen shuǵıllanatuǵın maydanda shınıǵıw ilajları ámelge asırıldı.

Bunday ilájlar respublikamızdıń barlıq aymaqlarında shólkemlestiriliwi belgilengen. Solay eken, bársheńizdi belsene qatnasıwǵa shaqıramız!