Qaraqalpaqstan jas tamashagóyler teatrında 12-may – “Xalıqaralıq miyirbiykeler kúni” bayramı múnásibeti menen Qaraqalpaqstan Respublikası Densawlıqtı saqlaw ministrligi, Ózbekstan Densawlıqtı saqlaw xızmetkerleri kásiplik awqamınıń Qaraqalpaqstan Respublikası keńesi, Ózbekstan Miyirbiykeler associaciyasınıń Qaraqalpaqstan bólimi menen birgelikte bayram ilajı ótkerildi.

Bayram ilajında Qaraqalpaqstan Respublikası Densawlıqtı saqlaw ministriniń orınbasarı G.Abdisametova, Ózbekstan Densawlıqtı saqlaw xızmetkerleri kásiplik awqamınıń Qaraqalpaqstan Respublikası keńesiniń baslıǵı L.Baybоsinova, Ózbekstan Miyirbiykeler associaciyasınıń Qaraqalpaqstan bóliminiń baslıǵı R.Mishenovalar qatnastı.

Ilajda orta buwın medicina xızmetkerleri arasında ótkerilgen “Jıldıń eń jaqsı orta medicina hám farmacevtika xızmetkeri” hám taraw mákemelerinde jumıs islep atırǵan miyirbiykelerdiń 7-10 jas aralıǵındaǵı perzentleriniń qatnasıwında ótkerilgen “Meniń anam miyirbiyke” súwret salıw tańlawlarınıń Qaraqalpaqstan Respublikası basqıshınıń jeńimpazları Qaraqalpaqstan Respublikası densawlıqtı saqlaw ministrligi hám Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası keńesiniń birgeliktegi tiyisli dárejedegi diplomları hám Keńes tárepinen tayarlanǵan bahalı sawǵaları menen sıylıqlandı.

Sonıń menen bir qatar orta buwın medicina xızmetkerlerine “Óz kásibiniń pidayısı” hám “Ádiwli ustaz” kókirek belgileri, sonday-aq, “Patronaj akusherka – hayal salamatlıǵı tayanıshı” tańlawınıń Qaraqalpaqstan Respublikası basqıshınıń jeńimpazlarına Qaraqalpaqstan Respublikası Densawlıqtı saqlaw ministrligi hám Ózbekstan Miyirbiykeler associaciyasınıń Qaraqalpaqstan bóliminiń birgeliktegi diplom hám sawǵaları tapsırıldı.

Bayram ilajları kórkem óner tarawı xızmetkerleriniń qızıqlı koncert baǵdarlaması menen dawam ettirildi.