Respublikalıq qıstawlı medicinalıq járdem ilimiy orayınıń Qaraqalpaqstan filialında jasalma qan aylanıw apparatı (AIQ) járdeminde quramalı kardioxirurgiyalıq operaciya tabıslı ámelge asırıldı. Bul ótkerilgen joqarı texnologiyalı operaciya medicinanıń rawajlanıwında áhmiyetli waqıya boldı.
Arttırılǵan júrek jetispewshiligi, bólmesheler aralıq tosıq kemisligi diagnozı qoyılǵan nawqaslarǵa operaciyalar ótkerildi. RQMJIO kardioxirurgları hám jergilikli kardioxirurg shıpakerleri tárepinen bólmesheler aralıq peregorodkanıń plastikası ámelge asırıldı – bul operaciya júrektiń jumısın waqtınsha toqtatıp, qan aylanıw funkciyaların jasalma qan aylanıw apparatına tolıq ótkeriwdi talap etedi.
Bul texnologiya sebepli xirurgiyalıq brigada joqarı anıqlıqta júrek diywalınıń anatomiyalıq pútinligin tiklew, ókpe gipertenziyası yamasa júrek jetispewshiligi sıyaqlı keyingi asqınıwlardıń aldın alıw imkaniyatına iye boldı.
Operaciya nátiyjeli juwmaqlandı. Nawqaslar reanimaciya hám intensiv terapiya bóliminde qánigeler qadaǵalawında. Olardıń jaǵdayı turaqlı dep bahalanbaqta.
Filial direktorı S.Begaliev: «Bunday operaciyalardıń nátiyjeli ámelge asırılıwına xızmetkerlerdi kompleksli tayarlaw, aldıńǵı metodikalardı engiziw hám operaciyalıq bloktı zamanagóy úskeneler menen támiyinlew arqalı erisildi. Bul Qaraqalpaqstan xalqına joqarı mamanlıqtaǵı qánigelerdi tayarlawda jańa imkaniyatlardı beredi» dep atap ótti.
