Mámleketimizde hayal-qızlar arasında onkologiyalıq keselliklerdi erte basqıshta anıqlaw boyınsha Skrining jumısları jáne de jetilistirilmekte
Ózbekstan Respublikası Prezidentinin 2024-jıl 22-noyabrdegi «Hayal-qızlar arasında onkologiyalıq keselliklerdi qadaǵalaw sistemasın jetilistiriw ilajları haqqında»ǵı qararı qabıl etilgen edi. Bul qararda hayal-qızlar arasında onkologiyalıq keselliklerdi erte basqıshta anıqlaw, emlew tarawın jetilistiriw, skrining tekseriwlerin nátiyjeli shólkemlestiriw, zamanagóy skrining usılların ámeliyatqa keńnen engiziw, usı baǵdarda alıp barılıp atırǵan ilajlardı muwapıqlastırıw, qánigelerdiń bilimin arttırıw hám kónlikpelerin jetilistiriw baslı wazıypa etip belgilengen.
Densawlıqtı saqlaw ministrligi tárepinen barlıq rayonlıq hám qalalıq medicina birlespelerine 30-40-50 jastaǵı hayal-qızlarda jatır moynı rak keselligi skriningi, adam papiloması virusın polimeraza shınjırlı reakciya (PCR) tekseriwi arqalı anıqlaw maqsetinde analizlew hám alınǵan analizlerdi Respublikalıq qánigelestirilgen ana hám bala salamatlıǵı ilmiy-ámeliy medicina orayı Qaraqalpaqstan Respublikası filialında shólkemlestirilgen oraylıq laboratoriyaǵa jiberiw wazıypası tapsırılǵan.
Joqarıda kórsetip ótilgen tapsırmalardı orınlaw maqsetinde Nókis qalalıq medicinalıq birlespesine qaraslı kóp tarmaqlı poliklinikanıń «Onko-baqlaw» xanasında 30-65 jastaǵı hayallardıń «Skrining-reestr programması» jaratıldı hám PCR tekseriwden ótkeriw rejelestirilgen 2684 hayaldan analiz alıw baslandı.
Onda, «teris» nátiyje shıqqan hayallar 10 jıldan soń qayta tekseriwden ótkeriledi, al «oń» nátiyje tastıyıqlanǵan hayallar qosımsha tekseriwge jiberiledi.
Hayal-qızlardıń salamatlıǵı óz qolında eken, hayal-qızlardı Skrining tekseriwden ótiwge shaqırıp qalamız.
QR Densawlıqtı saqlaw ministrligi
Málimleme xızmeti
