Puqaralardıń múrájatların tıńlaw arqalı tarawdaǵı mashqalalardı úyreniw, xalıqtıń tilek-ótinishlerine sheshim tabıw maqsetinde orınlarda ótkerilip atırǵan ushırasıwlar dawam etpekte.

Ámiwdárya rayonı medicina birlespesine qaraslı 6-sanlı shańaraq poliklinikasında Qaraqalpaqstan Respublikası Densawlıqtı saqlaw ministriniń birinshi orınbasarı Akmal Asqarov tárepinen rayon turǵınları ushın jeke qabıllawı ótkerildi.

Maqset – xalıqtı oylandırıp kiyatırǵan hám sheshimin tappay atırǵan medicinaǵa baylanıslı máselelerdi úyreniw hám olarǵa nızam sheńberinde tiyisli sheshim tabıwdan ibarat.

Qabıllawda tiykarınan puqaralar jumısqa jaylasıw, mayıplıǵı boyınsha toparǵa shıǵarıw, operaciya isletiw, respublikalıq emlewxanalarģa jollama alıw, dári-dármaq alıwda ámeliy járdem sorap múrajat etti.

Múrajatlardıń kópshiligi sol waqıttıń ózinde sheshim tapqan bolsa, ayırımlarına medicinalıq túsinikler berildi. Sonday-aq, waqıt talap etiletuǵın múrajatlar qadaģalawģa alındı.